Atalǵan is-sharaǵa otandyq jáne sheteldik qorǵanys-ónerkásip kesheni, ǵaryshtyq sala men aqparattyq qaýipsizdik salasynyń kásiporyndary, jetekshi konstrýktorlyq bıýro men ǵylymı-zertteý ınstıtýttary qatysady dep kútilýde. Uıymdastyrýshylardyń aıtýlaryna qaraǵanda, bıylǵy kórmeniń basty ereksheligi – «KADEX-2018» kórmesiniń quramdas bóligi retinde «Qazaqstandaǵy ǵarysh kúnderi» halyqaralyq forýmynyń ótkizilýi. Bul bastama Astana qalasynyń 20 jyldyǵyna oraı josparǵa engizilgen.
Kórmede alǵash ret otandyq jáne álemdik kosmonavtıkanyń jetistikterine arnalǵan jeke pavılon usynylatyn bolady. Sondaıaq álemdik jetekshi óndirýshilerdiń qarý-jaraǵy jáne áskerı tehnıka, áskerı jáne azamattyq maqsattaǵy ónimderi kórsetiledi.
Jalpy, «KADEX» kórmesi shartarapqa keńinen tanylǵan alańǵa aınalǵandyǵyn kelesi derekter de rastaı túsedi. Qazirdiń ózinde «KADEX-2018» kórmesine Reseı, Belarýs, Qyrǵyzstan, Armenııa, Iran, BAÁ, Túrkııa, Iordanııa jáne basqa memleketterdiń qorǵanys mınıstrlikteriniń bastamasymen 21 resmı delegasııa keletindikterin rastap otyr. Buǵan qosa, álemniń AQSh, Brazılııa, Germanııa, Izraıl, Úndistan, Qytaı, Reseı tárizdi 26 elinen 294 kásiporyn óz ónimderin ákeledi. Sonymen qatar sheteldik 96 kásiporynnyń basshylary bizdiń elordaǵa kelýge nıetti.
Demek, kórmege kelýshiler qarýlanýdyń ozyq úlgilerinen bastap, aqparattyq qaýipsizdikti qamtamasyz etýge deıingi zamanaýı jetistikterdi kóre alady.
Álbette kez kelgen memlekettiń álem aldyndaǵy abyroı-bedeli Qarýly Kúshteriniń jaı-kúıimen anyqtalady. Bul rette Qazaqstan Qarýly Kúshteriniń túbegeıli qalyptasyp, ózgelerge kórseteri de kóbeıdi. Onyń ishinde serjanttardan bastap generaldarǵa deıin áskerdiń barlyq salasy boıynsha otandyq oqý oryndarynda bilim alýda. Qarý-jaraqtyń jekelegen túrleri de elimizde jasalyp, óndiristiń taǵy bir qyry órkendeı tústi. Onymen qosa, áskerı tehnıka ónerkásibinde Reseı, Izraıl jáne Eýropa elderimen tıimdi baılanystar ornaǵan.
Qoryta aıtqanda, sheteldikter «KADEX-2018» kórmesin kórýge de, óz ónimderin kórsetýge de keledi. Al jalpy, buqara kórmeniń qyzyqtaryn 25-26 mamyr kúnderi tamashalaı alady.
Serik ÁBDIBEK,
«Egemen Qazaqstan»
